Oranjestad, 23 di October, 2024 – Hoofdstembureau ta oficialmente anuncia cu nan a habri aplicacion pa e personanan interesa pa forma parti di e Urnanan Electoral como miembro pa e eleccion cu lo tuma luga dia 6 di december 2024.
Presidente Suplente Sra. Grasita Griffith a informa cu tin un total di 70 Urna Electoral y dos “special A y B” cu ta encarga cu e proceso electoral. Cada urna electoral ta consisti di tres miembro, di cual un ta e presidente di e Urna Electoral. Ademas dos miembro suplente ta wordo nombra.
Esaki ta nifica cu un total di 360 miembro ta necesario pa cumpli cu e rol fundamental pa asegura cu e proceso electoral pa contribui na eleccionnan liber y husto.
Pa wordo selecciona como miembro mester tin e siguiente rekisitonan:
- Nacionalidad Hulandes
- Ta registra na Registro Civil y Censo prome cu 18 di September 2024
- Ta mayor di edad (18+) ariba dia di eleccion
Esnan cu ta interesa por manda un e-mail na [email protected] cu e siguiente informacion:
- Nomber y fam
- Fecha di nacemento
- Menciona e urna, si den pasado bo persona a traha den un caba
Hoofdstembureau ta invita personanan den enseñanza, otro profesionalnan, of personanan cu experiencia amplio den e tipo di funcionnan aki.
Miembro nan cu wordo selecciona lo ser notifica na tempo y por escrito. Tambe nan lo wordo informa debidamente di nan funcion y tareanan durante e dia di eleccion.
Como miembro di e Urnanan Electoral, bo tin un rol crucial pa asegura cu tur voto ta conta y cu e proceso ta transparente.
Pa mas informacion, bishita e website oficial di Conseho Electoral Aruba na er.aw y sigui nan na Facebook y Instagram @consehoelectoralaruba. E plataforma nan lo sirbi como un recurso importante pa votadonan, partidonan politico y publico general, pa keda al dia cu anuncionan, fecha nan y guia relevante pa e eleccion di Aruba.
